Успешна реализација на Летниот Кампус 2016

Со реализацијата на показната тактичка вежба „Сеопфатен пристап на операциите за поддршка на мирот“, денеска на армискиот полигон „Криволак“ заврши седмиот Летен кампус, на кој учествуваа околу 300 питомци и студенти од 13 држави.

По тој повод, заменик-министерот за одбрана на Република Македонија, Беким Максути, посочи дека претставува чест да се биде на овој настан и да се види како 13 различни култури и нации зборуваат еден заеднички јазик. „Питомците го зборуваат јазикот на лидерството и јазикот на соработката. Тие се идните лидери на своите земји, кои ќе претставуваат мост помеѓу државите и нациите“, посочи земник министерот Максути.

Сценарото на летниот кампус секоја година се надоградува со нови научени лекции, порача деканот на Воената академија, полковникот Орце Поповски. „Нашата основна цел ни е питомците од Република Македонија и питомците од државите кои партиципираат на Летниот кампус да ги обучиме за дејства во постконфликтни подрачја, за воспоставување на мир и соработка со цивилното население во таквите региони“, додаде полковникот Поповски. Тој воедно посочи дека проектот Летен кампус е еден од најдобрите промотори на Академијата речиси насекаде во светот, а пример за тоа е учеството на питомци од три континенти.

Летниот кампус се одржуваше во периодот од 4 до 13 јули, во Центарот за обука „Пепелиште“ и на армискиот полигон „Криволак“.